اقسام كليه علوم : تعرّف على جميع الأقسام في كلية العلوم في مصر ( تفاصيل كاملة )

المقال الشامل عن كلية العلوم لجميع جامعات الجمهورية. مش بس جامعة القاهرة وكل ما تريد أن تعرفه عن اقسام .كليه علوم وموادها ومجالات شغلها

محتويات مقالة اقسام كليه علوم:

نبذة عن كلية علوم ومجالاتها وكمان شغلها
مجالات الشغل الخاصة بكل اقسام كليه علوم
أقسام كلية علوم جامعة القاهرة والموجودة في جميع الجامعات

نبذة عن كلية علوم ومجالاتها و شغلها

كلية العلوم هي أحد أعرق الكليات وأهمها في مصر وجميع دول العالم مع إختلاف مسمى الكلية في كل بلد. بتتميز الكلية بتنوع مجالاتها وأقسامها وتنوع فرص العمل ودا اللي هنتعرف عليه حالا.

ننصحك بقراءة : الايميل الجامعي : كنز يوفر للطلبة مئات الدولارات (اعرف كيفية التسجيل به)

أولا : اى قسم من اقسام كليه علوم ممكن تشتغل منه على سبيل المثال:

مندوب ادوية طبية ، فى مراكز البحوث المختلفة ، فى المجال الاكاديمي ، معيد بالكلية سواء فى جامعة حكومية او خاصة . وايضا مدرس فى اى مدرسة حكومية او خاصة بس لازم تاخد سنة تربية.

ثانيا: كل اقسام الكيمياء. سواء منفرد او مزدوج تعمل فى مجال: توكيد ومراقبة الجودة ، السلامة والصحة المهنية ، المصانع والكيمياء الشرعية (كيمياء منفرد الافضل فيهم) ، شركات الادوية (حيوي وميكرو الافضل فيها) .

فى التحاليل الطبية داخل مصر كاخصائيين او دكاترة ، وحيوي وميكرو فقط اللى يعتبروا اخصائين او دكاترة تحاليل خارج مصر (زى السعودية) بعد ما يعملوا الماجستير او الدكتوراة.

وخريج اى قسم كيمياء تانى يعمل كفنى ، وكل خريجي المزدوج يعرفوا يشتغلوا شغل خريج كيمياء منفرد بس المنفرد بيفضل فى بعض الاماكن

مجالات الشغل الخاصة بكل اقسام كليه علوم

1. (كيمياء منفرد) : شركات الاسمده ومستحضرات التجميل والسكر والمياة والكهرباء ومصانع الزيوت والدهونوالصابون والمنظفات الصناعية والدهانات وصناعة البطاريات والسبائك والحديد والصلب

2. ( كيمياء / كيمياء حيوي ) : نفس شغل قسم الكيمياء + مصانع الادوية ، والمستحضرات الطبية ، ومعاهد الاورام ، ومعاهد السرطان ومصانع وشركات البتروكيماويات ومصانع الخميرة والادله الجنائيه والبحث الجنائي

3. ( كيمياء / ميكروبيولوجي ) : نفس شغل قسم الكيمياء + مصانع الادويه ، فى المستشفيات ومعامل الميكروبيولوجي.

لانه بيدرس الكائنات اللي بتنتج المضادات الحيويه ، والمزارع البكتريه ، وفى تحليل الفيروسات والطحالب والفطريات ، شركات الكيماويات ، تنقيه المياه فى شركات المياة ، و شركات الاغذية ، و شركات الالبان

4. ( كيمياء / حيوان ) : نفس شغل قسم الكيمياء + الحقن المجهري ، بنوك الدم ، اطفال الانابيب ، المراكز الطبية لعلم الاجنة

5. ( بيوتكنولوجى ) : نفس شغل اقسام كيمياء حيوي وميكروبيولوجى وكيمياء حيوان و (بره مصر) بيشتغل فى المستشفيات لعلاج الامراض الوراثيه باستخدام تطبيقات البيوتكنولوجى فى الصناعة والزراعة وغيرها

تابع مجالات الشغل الخاصة بكل اقسام كليه علوم

6. ( كيمياء / نبات ) : نفس شغل قسم الكيمياء + معامل تطوير الزراعة وشركات الاسمدة والكيماويات والمجالات البيئية ومنظمات حماية البيئة وغيرهم.

7. ( كيمياء / حشرات ) : نفس شغل قسم الكيمياء + معامل البحوث الزراعيه ، وفى وزارة الزراعة ، ومصانع المبيدات الحشرية ، ومراكز مكافحة الحشرات وغيرها.

8. ( بيوفيزياء منفرد ) : المستشفيات والمعاهد الطبيه زي الاورام والليزر والقصر العينى و57357 ، البحوث النوويه ، بحوث الاشعاع والاشعاعات واثرها علي الخلايا .

وكذلك المركز القومى للبحوث ، معهد بحوث امراض العيون ، التصوير الاشعاعى والعلاج الاشعاعى ، الطاقة النووية والذرية زى مركز البحوث النووية وشركات الاجهزة الطبية.

10. ( فلك منفرد – فيزياء / فلك – فيزياء / علوم جويه) : مرصد حلوان والقطامية وبمركز الاستشعار عن بعد وبالمركز القومي للبحوث الفلكية وهيئة الطاقة الشمسية والمركز القومي للفلزات ، في برج المراقبه في المطار وغيرها

11. ( جيولوجيا منفرد – بترول – جيوفيزياء منفرد ) : شركات البترول ، التعدين ، المياة ، المعادن ، المناجم ، الابار ، الاثار واي حاجة من تحت الارض ، الهيئة القومية للاستشعار عن بعد ، المراصد الجيولوجية والجيوفيزيقية.

12. ( حاسب منفرد – رياضة / علوم حاسب) : فى وحدات تكنولوجيا المعلومات ، مطور برامج ، مصمم او مطور شبكات ، مطور تطبيقات الموبايل ، مطور جافا ، مصمم قواعد بيانات وغيرها.

ننصحك بقراءة : career shift : متى تغيّر مجال عملك وما هي أهم النصائح

اقسام كليه علوم جامعة القاهرة والموجودة في جميع الجامعات

ملوحظه : ما يسري على جامعة القاهرة يسرى على جميع جامعات الجمهورية مع اختلافات بسيطه جدا

اقسام كليه علوم جامعة القاهرة والموجودة بمعظم جامعات الجمهورية 24 قسم:
7 اقسام متاحة لطلبة علمى علوم فقط
8 اقسام متاحة لطلبة علمى رياضة فقط
9 اقسام مشتركة لطلبة علمى علوم وعلمى رياضة
المواد الاتية خاصة بجامعة القاهرة اما الدراسة والشغل فلجميع جامعات الجمهورية

اولا: 7 اقسام لطلبة علمي علوم فقط

1. كيمياء / كيمياء حيوي:

في جسم الانسان زي البروتين والفيتامينات والكربوهيدرات
وبيدرس الاحماض النوويه (DNA) وعلم المناعة وعلم الوراثة وعلم الهرومونات والانزيمان والاورام والبيولوجي وتدرس فيها جميع التفاعلات الكميائيه الخاصه بالكائن الحى وجسم الانسان.

وتدرس فيها الكيمياء العلاجيه زى المسكنات وخافضات الحرارة ومضادات البكتيريا والفطريات والفيروسات والطفيليات .

وهى من اقوى الفروع فى الكيمياء وتتخصه من بيولوجى ، بيدرس كيميات كتير (كيمياء عضوية وغير عضوية وتحليلة وفيزيائية وكيمياء العقاقير وكيميا الفيتامينات وكيميا إكلينيكية) .

كمان بيدرس الهندسة الوراثية والعلاج الجيني والاحصاء الحيوي ، ( مجالات العمل ) : في معامل وشركات التحاليل الطبية وشركات ومصانع الادوية .

ومعاهد الاورام ، ومعاهد السرطان ، ومصانع وشركات المستحضرات الطبية ، ومصانع كتير جدا زي البتروكيماويات ومصانع الخميرة وغيرها. ويستحسن تاخد دبلومه التحاليل الطبيه او دبلومة الكيميا الحيوية

2. كيمياء / كيمياء ميكروبيولوجي

الميكروبيولوجى هى علم الاحياء الدقيقة وتدرس فيها كل فروع الميكروبيولوجى (البكتريا والفطريات والطحالب والفيروسات) وحياتها وكل حاجة عنهم .

بتدرس تأثير الميكروبيولوجي على الانسان والامراض اللي بيسببها والانزيمات ، والسموم الميكروبية ، الهرمونات النباتية ، علم المناعة ، علم الوراثة ، علم الاحماض النووية (DNA) ، ميكروبيولجي طبية ، ميكروبيولوجي الاغذية ، الاحصاء الاحيوي.

وتدرس نص مقرراته كيمياء زي (كيمياء حيويه وعضويه وتحليله وفيزيائيه) ، ( مجالات العمل ) : فى معامل وشركات التحاليل الطبية ، وشركات الادويه .

وكذلك وفى المستشفيات ، وفى معامل المكيروبيولوجي ، وتنقية المياة فى محطات وشركات المياة ، وشركات الاغذية ، شركات الالبان ، شركات الكيماويات .

وليه الافضلية فى الشغل هو وقسم الكيمياء الحيوية فى بعض شركات الادوية داخل مصر وهما الوحيدين المعترف بهم كاخصائيين بعد الماجستير فى التحاليل خارج مصر (السعودية)

أقسام موقعنا : ما رأيك في تصفحها بعد قراءة المقالة

3. كيمياء / حيوان

بتدرس نص المواد كيمياء ونصها تبع علم الحيوان ، فيدرس الانسان وكل ما يتعلق بالمملكه الحيوانيه

ويدرس الفسيولوجى (علم وظائف الاعضاء) ، الهيماتولوجى (علم امراض الدم) ، الامبريولوجى (علم الاجنه) والاناتومى (علم التشريح) والسيريولوجى (علم المناعه) .

الباراسيتولوجى (علم الطفيليات) ، والهستولوجى (علم الانسجه) والجيناتيك (علم الوراثه) ، والبيولوجي بتاع الحيوان ، الفقاريات ، اللافقاريات . ( مجالات العمل ): نفس شغل قسم كيمياء منفرد + فى اطفال الانابيب ، الحقن المجهرى ، بنوك الدم ، المراكز الطبية لعلم الاجنة ، مراكز البحوث المختلفه

4. كيمياء / نبات

بيدرس نص مواده كيمياء ونصها من علم النبات. فيدرس كل ما يتعلق بالمملكه النباتيه بداية من تشريح النبات ، علم المناعه ، الفسيولجى (علم وظائف الاعضاء) ، اناتومى (علم التشريح) .

وكذلك علم التنفس ، علم البيئة ، علم الوراثة ، علم الميكروبيولوجى ، علم الطحالب ، علم النباتات طبية ، الاحياء الدقيقة وتطبيقاتها ، بيوتكنولوجى .

وعلم الفلورا ، الهندسة الوراثية ، زراعة انسجة ، والمورفولوجى والبيولوجي بتاع النبات وتصنيفاته والعوامل البيئيه اللي بتأثر فيه و التلوث والانزيمات والطحالب

5. كيمياء / حشرات

بتدرس نص المواد من كيمياء ونصها من علم الحشرات ، فيدرس البيولوجي الخاص بالحشرات و تشريح انسجتها و الشكل الخارجى للحشرات و تصنيفاتها و تقسيماتها ، علم بيئه الحشرات ، علم الطفيليات .

الوبائيات و تحاليل الطفيليه ، والفيسيولوجي للحشرات ، ومكافحه الافات والسيطره عليها ، علم المناعه ، علم الميكروبيولوجي ، الباثولوجي للحشرات .

وكذلك علم السموم ، الشكل الخارجى والداخلى والأداء الوظيفى للحشرة ، أنماط الحياة ، التأثيرات البيئية والدورة الفصلية .

أشكال التأثيرات المتبادلة فى الآهلات الحيوية المجموعات الهامة للحشرات ، الحشرات النافعة ودورها فى تلقيح النباتات ونشر البذور ، المنتجات التجارية المشتقة من الحشرات ، الحشرات المفترسة والمتطفلة ، أهمية الحشرات ككانسات ، الحشرات فى النظام البيئي وغيرها .

( مجالات العمل ) : نفس شغل الكيمياء + مصانع المبيدات الحشرية ، مراكز مكافحة الحشرات ، معامل البحوث الزراعيه ، وزارة الزراعة وغيرها

6. بيوفيزياء منفرد

البيوفيزياء هي علم قائم بذاته ومختلف عن الفيزياء و الاحياء ، هو يعتبر تطبيق لمباديء الفيزياء وتقنياتها لدراسة تركيب ووظيفة الخلية الحية.

ودراسة بعض القوانين الفيزيائية التي تؤثر في الجزيئات الحيوية والعمليات الحيوية ندرس بها الكهربية خلال الجسم الحيوى والجهاز العصبى والخلية العصبية ، الجهد الكهربى للأعصاب ، رسم عضلات القلب والمخ والعين ، فيزياء الأشعة السينية التشخيصية .

استخدامات الانويه المشعه فى أجهزه القياس الإشعاعى الأساسية وتطبيقاتها والوقاية من الإشعاع ، وحدات الوقاية
الإشعاعية وحدودها فى الطب النووى .

تطبيقات الحرارة والبرودة ، حفظ الدم والأنسجة والجراحه بالتبريد ، وإستخدام الضوء فى الطب فلها تطبيقات في الطب حيث توفر تفسيراً للعلاقات الوظيفية بين أجزاء الجسم وفي دراسة نظام المناعة ضد الامراض وتم اعتماد أربع تخصصات رئيسية وهى :

البيوفيزياء الجزيئية و الطبية و النظريه و البيئية والمدرستين المتخصصتين واللى ليهم النصيب الكبير من الاهتمام والتطور هما البيوفيزياء الجزيئية والبيوفيزياء الطبيه ،

وشغله: في المستشفيات والمعاهد الطبيه زي الاورام ومعاهد الليزر ومعهد بحوث امراض العيون ، والقصر العيني ، 57357 ، فى مراكز البحوث زي البحوث النووية .

بحوث الاشعاع والاشعاعات واثرها علي الخلايا ، المركز القومى للبحوث ، التصوير الاشعاعى والعلاج الاشعاعي ، شركات الاجهزة الطبية والمناظير وغيرها

7. جيولوجيا منفرد

الجيولوجيا هي علم دراسه الارض وأصلها وطبقاتها ومكوناتها وكيفية تكوينها وتطورها ، هتدرس الميكانيكا اللى بتتكون بيها الظواهر الطبيعية زي الجبال العادية والجليدية والبراكين وتاريخ الارض منذ النشاة وترتيب تكونها .

تقدير عمر الأرض النسبي والمطلق ، الجدول الزمني لتاريخ نشأة الأرض ، الحفريات والتحفر ، التبلور ، الخواص الفيزيائية والكيميائية للمعادن وتقسيماتها وانواعها .

كمان هتدرس جيولوجيا البترول وجيولوجيا المياة ، وجيولوجيا حقلية وغير حقلية ، وجيولوجيا مصر وافريقيا وغيرها .

( مجالات العمل ) : في شركات البترول ، والمياه ، وجهاز شئون البيئه ، وقطاع الاثار ، والمناجم ، الهيئة القومية للاستشعار عن بعد ، علوم الفضاء ، المراصد الجيولوجية ، شركات التعدين والمحاجر

ثانيا: 8 اقسام لطلبة علمى رياضة فقط

1. حاسب منفرد

بتدرس مبادئ البرمجة من النظم العددية والخوارزميات وهياكل البيانات ونظم التشغيل وقواعد البيانات والذكاء الاصطناعى والتشفير وغيرها ، وشغله واسع اوى فى الكمبيوتر والسوفت وير .

هى شبه قسم علوم حاسب فى كلية حاسبات ومعلومات والفرق ان عندنا الاهتمام بالنظرى والرياضة على حساب التطبيق بس لو قدرت تفهم النظرى كويس هيبقي سهل عليك تتعلم اى تطبيق عليه.

وهتبقي كويس عن اى حد ولازم تاخد كورسات عشان تطور نفسك. ولو اتخرجت بتقدير جيد تقدر تقدم فى منحة وزارة الاتصالات (ITI) ، ( مجالات العمل ) : فى وحدات تكنولوجيا المعلومات فى الشركات والمدارس والجامعات ، مطور برامج ، مصمم او مطور شبكات ، مطور تطبيقات الموب ، مطور جافا ، مصمم قواعد بيانات وغيرها

2. رياضيات منفرد

يعني رياضه باحته وتطبيقية يعنى لو بتعشق الرياضه ادخله ، كل اللى بتتطلبه الرياضيات هو أن الطالب يكون مجتهد ، مش شرط يكون عبقرى علشان يدرس رياضيات أو يستمتع بعلومها .

ما تكتفيش بدراسة الكلية عشان احنا متأخرين أوي في الكلية عن باقي الشعوب اتعلم لوحدك ع النت استفيد بوقتك عليه اليوتيوب مليان كورسات بس ما تقولش كفاية عليا الي باخده في الكلية .

( مجالات العمل ) : فى المجال الاكاديمي ، معيد سواء فى جامعة حكومية او خاصة، مراكز الاحصاء والمتابعة ، معامل الابحاث ،هيئات الأ رصاد الجوي .

مراكز التعبئة والاحصاء ، مجالات عمل الحاسب الألي ، مدرس ، باحث ، محلل بيانات ، في البنوك ، مسئول قواعد بيانات ، مبرمج في شركات الكمبيوتر

3. علوم البترول الجيولوجية

لقسم موجود فى كلية العلوم جامعات القاهرة ، عين شمس ، الاسكندرية ، المنيا ، الاسماعيلية ، بورسعيد ، المنوفية ، المنصورة ، اسيوط ، السويس ، الزقازيق ، وطنطا وغيرهم.

و بتدرس فى سنة اولى مواد جنيرال العادية اللى هى كيمياء وفيزياء ورياضة وجيولوجيا وجيوفيزياء. بتكون جيوفيزيائى او جيولوجي مش مهندس بترول .

مشكلة القسم ان شغله صعب تلاقيه ولدرجة ان ناس تقولك معكش واسطة متدخلوش . بيدخل القسم اى حد هيدفع فلوسه ومفيهوش اى ميزة عن الاقسام العادية .

لانك بتدرس مواد جيولوجيا وجيوفيزيا وبتشتغل نفس شغل اقسام جيولوجيا وجيوفيزياء فى الاخر . وحتى مفيهوش مبنى ولا معامل خاصة بي ، ولا اى حاجة سوا المواد اللى بتدرسها فقط .

وشغله: نفس شغل قسمي جيوفيزيا وجيولوجيا ، فادخل اى قسم منهم ووفر فلوسك من البداية ولو مش ضامن تدخلهم ممكن تحاول فى سنة اولى تجيب تقديرهم وتتخصص فيهم ولو مجبتهوش تقدر تدخل بترول من سنة تانية عادى طالما اخدت مواد جيوفيزيا وجيولوجيا وتبقي وفرت فلوس سنة اولى

4. بيوتكنولوجي

بتدرس نص مواد كيمياء والنص التانى احياء ، بتدرس فى سنة اولى مواد جنيرال اللى هى كيمياء وفيزياء ورياضة وحيوان ونبات .

وبعد كدا بتدرس كيميات كتير . على سبيل المثال الكيمياء العضوية والكيمياء الغير عضوية والكيمياء الفيزيائية والكيمياء التحليلية وغيرها وبتدرس العامل الوراثي في النبات والحيوان والانسان .

وده يعتبر مدخل لعلاج الامراض ولزيادة الانتاج فى الحيوانات والنباتات ، وبيدرس علم الاحماض النووية وتحاليله وعلم المناعة وغيرها .

(مجالات العمل). نفس شغل اقسام كيمياء حيوي وميكروبيولوجى وكيمياء/حيوان اللى قولناها فوق ، وبره مصر بيشتغل فى المستشفيات لعلاج الامراض الوراثية وغيرها ،

5. فيزياء منفرد

قسم عشاق الفيزياء ودراسته فيزياء كهربيه وحراريه وكل انواع الفيزياء والدراسة فالقسم عايزة انك تكون معتمد علي نفسك شوية وانك ما تعتمدش فقط على المنهج الجامعي و تشتغل مع نفسك في البحث الخارجي .

والقسم لازم تتخرج منة على الاقل بتقدير جيد جدا عشان تلاقي شغل محترم معيد في اي جامعة خاصة او شغل في هيئة الطاقة النووية .

وفية شغل في مصانع الاجهزه الكهربيه ومصانع الحديد والفحم بيكون فني بيمسك الالات الكبيرة وبيعملها حسابات زي حسابات الديناميكا الحرارية وهكذا، كفيزيائى طبي .

وشغل اكاديمي اكتر من كونة فني يعني باحثين في مراكز البحوث او في مدينة زويل او اعضاء هيئة تدريس فالجامعات او باحث في الجامعات الخاصة او الاجنبية او سيرن او وكالات الفضاء بتحتاج فزيائين او المفاعلات النووية .

بس كل دة خارج مصر لازم تدرس ماجيستير ودكتوراه و ايضا لازم تدور علي منحة عشان تدرس ماجيستير ودكتوراه برة .

لان الفيزياء من العلوم التقيلة اللى محتاجة تدرسها بره. وعلي الاقل عشان تاخد منحة للدراسة فالخارج لازم تكون جايب جيد جدا ، ولو الدنيا قفلت فى وشك تعرف تبقي مدرس فيزياء بعد ما تاخد سنة تربوي

6. كيمياء منفرد

من أهم اقسام كليه علوم وبتدرس فيه الكيمياء بكل فروعها :

عضويه وغير عضوية وحراريه وكهربيه وتحليليه وفيزيائية وحيوية وثيرمو والكتروم واروماتيك وستريو وبروتين وكربوهيدرات وكوانتم .

( مجالات العمل ) : فى معامل وشركات التحاليل الطبية ، شركات الادوية والاسمدة ومستحضرات التجميل والسكر والمياة والكهرباء .

ومصانع الزيوت والدهون والصابون والمنظفات الصناعية والدهانات وصناعة البطاريات والسبائك والحديد والصلب . بيفضل فى شغل المصانع وفى الكيمياء الشرعية عن اى قسم اخر

7. فلك منفرد

بتدرس تاريخ الفلك ، وأرصاد العين المجردة ، النظام الشمسي ، الظواهر الفلكية وأيضا حركات الكواكب والنجوم الظاهرية ، والحشود والنجوم وأنواعهم ، المادة بين النجمية ، والمجرات ،.

نشأة الكون بصفة عامة ، التعرف علي السماء ليلا ، خرائط النجوم ، الكواكب والكويكبات النجمية وطرق التعرف عليها وغيرها .

( مجالات العمل ):

فى مرصد حلوان ، مرصد القطامية ، باحث بمركز الاستشعار عن بعد او بالمركز القومي للبحوث الفلكية واي مركز في مصر فيه فيزيا وأيضا هيئة الطاقة الشمسية ، المركز القومي للفلزات ، فى وكالة ناسا الفضائية زي عصام حجى

ملحوظه دي مش كل الأقسام , دي فقط أشهر الأقسام وفيه أقسام أخرى متفرعه ومشتركه بينهم .

في النهايه نشكر صفحة اقسام كليه علوم على الفيسبوك على توفير معظم تلك المعلومات وتقديمها لنا رابط الصفحة

هل تريد أن يصلك يومياً كل ما يخص التعلم عبر الإنترنت ؟ فقط انضم الينا على التليجرام اشترك في قناتنا على التليجرام

لا يوجد محتوى

اقسام كليه علوم : تعرّف على جميع الأقسام في كلية العلوم في مصر ( تفاصيل كاملة )